O SXG apoia a folga na CRTVG e especialmente ós traballadores temporais

Contratos de fin de semana e despidos en vacacións, exemplos da precariedade que sufren os contratados por ETTS e productoras

24 de maio O SXG respalda as movilizacións laborais na Compañía da Radio Televisión de Galicia (CRTVG), protestas que comezan o 25 de maio cunha folga. O SXG pide á dirección do ente e a Xunta de Galicia que garantan o dereito a folga de tódolos traballadores, especialmente dos profesionais contratados a través de Empresas de Traballo Temporal (ETT´S) e produtoras externas.

Contratos dun fin de semana e vacacións sen pagar na CRTVG

O Sindicato lembra que son precisamente o numeroso grupo de traballadores que non forman parte da plantilla fixa da CRTVG os que máis sufren a precariedade laboral. Contratos por un fin de semana, despidos durante as vacacións ou encadenamento de bolsas no lugar de firmar contratos son algunhas das inadmisibles prácticas laborais aplicadas a diario por esta compañía pública.

O SXG denuncia que, co suposto fin de reduccir a débeda do ente, a CRTVG leva anos recortando as condicións laborais a través de ETT´S e productoras privadas. Por iso, o Sindicato anima a tódolos xornalistas e técnicos a participar na folga. E é que, aínda que non participou na convocatoria da movilización ( pois aínda está completando a súa posta en marcha), o SXG apoia os motivos esenciais da convocatoria.

Ademais, a organización fai un chamamento a tódolos actores sociais (administracións, partidos políticos, empresas e universidades) para pactar xa medidas para dignificar as condicións laborais dos traballadores da comunicación; pois é evidente que a precarización do traballo dos xornalistas perxudica a calidade da información que recibe e cidadanía.

O SXG foi constituído o pasado 27 de febreiro en Santiago por iniciativa de máis de 150 traballadores da comunicación. Apoiar á compañeira de COPE Pontevedra que gañou recentemente un xuízo para ver recoñecida a súa relación laboral coa emisora ou esixir a presencia policial en situacións potencialmente conflictivas (como o enterro dun membro da familia Charlín en Vilanova no que foron golpeados varios reporteiros gráficos) son dous exemplos do traballo xa realizado polo SXG, que lanzou recentemente a súa primeira campaña de afiliación.

O SXG pide a retirada do concurso de concesión de emisoras porque facilita a precariedade

A convocatoria da Xunta de Galicia para crear máis de 100 emisoras non apoia a creacción emprego estable

A Xunta estableceu unhas condicións para o concurso de concesión de emisoras dixitais de televisión que facilitan o aumento da precariedade laboral entre os profesionais da información. Así valora o Sindicato de Xornalistas de Galicia (SXG) o concursos público aprobadosesta semana polo Goberno Galego para a adxudicación de emisoras. O SXG pide a retirada e a reforma deste concurso para que o nacemento de máis de 100 compañías da comunicación repercuta na creación de postos de traballo dignos.

O “Decreto 81/2005 de regulamento do réxime xurídico da servizo público de televisión dixital” ( e as súas bases administrativas e técnicas) non ten vocación de loita contra as malas prácticas laborais habituais no xornalismo. Así, a creación de emprego é mencionada sen facer a imprescindible distinción entre a contratación estable de profesionais e outras formas de contratación precarias.

Ademais, o SXG cree inadecuada e insuficiente a puntuación que nos baremos de valoración de concesións se fai da creación de postos traballo. A este apartado deixase só unha puntuación de ata 15 puntos, sen especificar se os postos de traballo pertencen a plantilla estable da empresa.

Esta absoluta falla de apoio á estabilidade dos traballadores no intre da creación de máis de 130 futuras empresas de comunicación pode causar, en valoración do SXG, o aumento do inmenso banco de emprego en precario no audiovisual. A explotación laboral de estudantes das diversas escolas e facultades de xornalismo e comunicación audiovisual pode ser outra das consecuencias desta convocatoria.

O abuso do número de estudantes en prácticas, os contratos como autónomos e os contratos a tempo parcial para xornadas completas son actuacións frecuentes entre as empresas da comunicación en Galicia. O SXG lamenta que, a través desta convocatoria, a Xunta desperdiciase unha oportunidade única de promover no sector a estabilidade laboral e sentar as bases dun xornalismo independente e profesional. Ademais, o SXG entende que a precarización do traballo dos xornalistas está afectando negativamente ao dereito á información dos cidadáns, amparado pola Constitución. Por todo isto, o SXG solicita á Xunta a inmediata retirada do concurso e a reforma das súas condicións para que o peso da contratación laboral estable sexa determinante á hora de realizar as adxudicacións.

O SXG solidarízase cos compañeiros agredidos nun enterro da familia Charlín

O SXG pide as autoridades que expliquen porque, tendo en conta os antecedentes de agresións en situacións similares, non había policía

O Sindicato de Xornalistas de Galicia (SXG) mostra publicamente o seu apoio ós reporteiros gráficos agredidos onte en Vilanova de Arousa (Pontevedra) durante o enterro de José Benito Charlín. O SXG esixe ás autoridades, en primeiro lugar á Delegación do Goberno en Galicia, que expliquen porque non había Policía no lugar dos feitos que impedise as agresións.

O Sindicato lembra que o lamentable incidente de Vilanova non é o primeiro caso no que profesionais de medios da comunicación son agredidos mentres elaboran noticias sobre persoas relacionadas con condenados por narcotráfico nesta zona. Tendo en conta estos antecedentes, o SXG considera especialmente grave a ausencia de axentes da orde neste enterro, no que varios profesionais resultaron mallados, concretamente, catro fotógrafos de Faro de Vigo, Diario de Pontevedra, Diario de Arousa e La Voz de Galicia e un cámara da Productora Faro. Ademais, o material de traballo dalgúns dos profesionais que se viron envoltos neste incidente, tal e como recolleron os medios de comunicación, foi destrozado.

O SXG ponse a disposición dos agredidos para axudalos en todo o posible. Por outra banda, o Sindicato lembra ás empresas a importancia de que os xornalistas e reporteiros gráficos formen parte da plantilla das súas compañías, e non como autónomos. Deste xeito, aumentaría o grado de protección laboral dos traballadores da información ante posibles accidentes ou agresións.

Ademais, solicita a as autoridades que tomen as medidas necesarias para protexer ós xornalistas nos actos públicos, especialmente cando, como neste caso, se pode prever con antelación a posibilidade de situacións de tensión cara os informadores. De non estar garantida a súa integridade, o SXG lembra os traballadores que poden negarse a cubrir este tipo de actos.

O SXG, que celebrou a súa Asamblea Constituínte o pasado 27 de febreiro en Santiago de Compostela, recorda que o seu principal obxectivo é protexer e defender os dereitos de todos os traballadores da comunicación en Galicia, incluidos reporteiros gráficos, cámaras, infografistas e demais profesionais que exercen a súa actividade nesta comunidade autónoma.

O Sindicato de Xornalistas de Galicia solidarízase cos xornalistas da Coruña ante a actitude do alcalde

Francisco Vázquez expulsou de malos modos ós reporteiros gráficos dun acto público, ante o que os xornalistas realizaron un plante

O Sindicato de Xornalistas de Galicia apoia a resposta dos xornalistas que cubren a información do Concello da Coruña, que o pasado día 30 de marzo fixeron un plante na Praza de Maria Pita ante a inaceptable actitude do Alcalde da Coruña. Previamente a este acto de protesta, Francisco Vázquez expulsara con malas formas ós reporteiros gráficos que cubrían a inauguración dunha exposición da ONCE no Palacio María Pita.

A Xunta Executiva en funcións do SXG lamenta e condena expresamente este comportamento de Francisco Vázquez, que en ocasións anteriores xa ten dado mostras dun trato abusivo e irrespetuoso cara ós profesionais da prensa. O SXG lembra que a labor dos xornalistas e reporteiros gráficos fai realidade o dereito constitucional da cidadanía a recibir información.

Paco Vázquez debe pedir desculpas

Por isto, SXG pídelle ó alcalde da Coruña que se desculpe publicamente diante dos traballadores ós que impediu, sen causas xustificadas, o exercicio da súa profesión dificultando, asemade, o dereito dos coruñeses a estar ó tanto e ter imaxes dos actos públicos nos que participa o seu alcalde. Ademais, o SXG recorda a tódolos cargos públicos a súa obriga de respetar e facilitar, na medida das súas posibilidades, o traballo dos profesionais da comunicación, que actualmente en Galicia teñen que desenvolver a cotío o seu labor nunhas condicións laborais de gran precariedade laboral e de medios, que se ven agravadas por feitos como estes.