O SXG gaña as eleccións en Diario de Ferrol e logra representación en Radio Coruña e La Región

O Sindicato de Xornalistas de Galicia (SXG) representará aos traballadores do Diario de Ferrol –que forma parte da Editorial La Capital- grazas a súa vitoria nas eleccións sindicais organizadas esta semana. Ademais, o SXG tamén conseguiu recentemente representación noutros dous medios, Radio Coruña –que emite a programación da Cadea Ser– e o xornal La Región de Ourense.

A candidatura do SXG no Diario de Ferrol obtivo quince votos, por oito da CIG. Polo tanto, unha afiliada do Sindicato pasará a ser a delegada sindical na cabeceira ferrolá.

O SXG tamén acaba de obter un representante no comité empresa de Radio Coruña, no que tamén lograron un delegado CC.OO. e UGT. Ademais, o Sindicato logrou dous representantes na repetición das eleccións en La Región de Ourense. Neste diario o Comité de empresa tamén estará formado por tres representantes de UGT, dous de CC.OO. e un da CIG.

En definitiva, o SXG logrou catro representantes sindicais en dúas semanas. O SXG consegue así obter presenza nos comités en todos os comicios aos que se presentou ata agora.

Como loitar contra a precariedade?

O SXG quere agradecer publicamente o esforzo dos compañeiros que se animaron a presentarse baixo as súas siglas. Ademais, o Sindicato lembra a todos os traballadores do sector da comunicación de Galicia que para acabar coa precariedade na profesión é imprescindíbel ter unha representación activa nos comités de empresa.

Por iso anima a todos os profesionais interesados a solicitar a axuda do SXG para organizar candidaturas nas súas empresas do sector da comunicación.

O Sindicato de Xornalistas gaña as eleccións sindicais en La Región

O Sindicato de Xornalistas de Galicia (SXG) gañou as eleccións sindicais que se celebraron onte no xornal La Región. O SXG obtivo tres representantes no Comité de Empresa, por dous de Comisión Obreiras, dous de UXT e dous da CIG.

Aumentar os días libres, -que no caso da maior parte dos traballadores son de só catro días ao mes- e lograr a remuneración das horas extras son algúns dos puntos do programa presentado polo SXG. O Sindicato tamén loitará para conseguir un aumento dos salarios, mellorar a conciliación da vida familiar e laboral e impulsar a renovación tecnolóxica dos medios cos que traballan os profesionais.

Chamanento ao diálogo
A Executiva do SXG quere felicitar publicamente a todos os traballadores de La Región que acudiron ás urnas para participar no proceso electoral. Especialmente, o SXG felicita aos membros da súa lista pola iniciativa demostrada, polo interese en mellorar as condicións laborais dos seus compañeiros e polo traballo e moitas horas adicadas a este proxecto.

O Sindicato de Xornalistas felicita e tamén fai un chamamento á colaboración ao resto dos sindicatos elixidos e, especialmente, á dirección de La Región para, entre todos, tentar mellorar a situación laboral dos traballadores e tamén o prestixio e vendas do xornal.

Ademais, o Sindicato lembra que, unicamente, a través da negociación e da colaboración solidaria de todos os traballadores do sector poderase loitar contra a precariedade que se vive na industria da comunicación de Galicia.


Resultados detallados

O SXG foi o sindicato máis votado na empresa -formada por talleres e redacción -con 30 votos, seguido da CIG, con 29; CC.OO, 25 e UXT, 15. O SXG tan só se presentou na redacción, onde tamén sacaron representación a CIG, con 15 votos e CC.OO., 25. En talleres, a UXT tivo 15 e a CIG 14. No proceso electoral houbo catro votos en blanco e dous nulos.

O SXG pide a readmisión das dúas traballadoras despedidas por La Región

O Sindicato de Xornalistas de Galicia (SXG) expresa a súa repulsa ao despido de dúas traballadoras polo xornal La Región de Ourense. O Sindicato solidarízase con estas asalariadas e co resto do cadro de persoal, inmerso na negociación do convenio colectivo coa dirección da empresa. O SXG considera igualmente intolerable que se despedise a unha representante dos traballadores no Comité de Empresa. E é que a dirección de La Región despediu fulminantemente a Eva González, representante de FES-UGT.

A organización entende que o despido é unha forma de tentar amedrentar aos traballadores na presente negociación do convenio. Isto sucede, ademais, nun xornal como La Región , que non ofrece unhas boas condicións laborais aos seus asalariados.

Por iso, o SXG solicita a inmediata readmisión das dúas traballadoras. Ademais, o Sindicato mostra o seu apoio ás mobilizacións en solidariedade coas despedidas e chama aos seus afiliados e o resto de traballadores de La Región e dos medios de comunicación a participar nelas. Só a través da mobilización e da negociación cos directivos se logrará poñer fin a precarización das condicións laborais na industria da comunicación de Galicia.

O SXG xa contactou co director de La Región para reclamar que mellore as condicións laborais dos seus traballadores. En todo caso, esixe de novo que as problemáticas laborais se solucione pola negociación e nunca pola vía dos despidos.